നടപടി വേഗത്തിലാക്കാൻ കേരള പൊലീസിന്റെ ‘HM ACTS’

തിരുവനന്തപുരം: ആഭ്യന്തരമന്ത്രിക്ക് പൊതുജനങ്ങൾ നേരിട്ട് നൽകുന്ന പരാതികളിൽ തുടർനടപടികൾ വേഗത്തിലാക്കുന്നതിനായി കേരള പൊലീസ് പുതിയ ഡിജിറ്റൽ സംവിധാനം ആരംഭിച്ചു. ‘എച്ച്.എം. ആക്ട്സ്’ (HM ACTS) എന്ന പേരിലുള്ള ഡിജിറ്റൽ പെറ്റിഷൻ മാനേജ്മെന്റ് സംവിധാനമാണ് നിലവിൽ വന്നത്. പരാതികൾ കൃത്യമായി രജിസ്റ്റർ ചെയ്യുന്നതിനും ബന്ധപ്പെട്ട പൊലീസ് ഉദ്യോഗസ്ഥർക്ക് കൈമാറുന്നതിനും തുടർനടപടികൾ നിരീക്ഷിക്കുന്നതിനും പുതിയ സംവിധാനത്തിലൂടെ സാധിക്കും.
പൊലീസ് ആസ്ഥാനത്ത് നടന്ന ചടങ്ങിൽ ആഭ്യന്തരമന്ത്രി രമേശ് ചെന്നിത്തലയാണ് പുതിയ ഡിജിറ്റൽ സംവിധാനത്തിന് തുടക്കം കുറിച്ചത്. ആഭ്യന്തരമന്ത്രിയുടെ ഓഫീസിൽ ലഭിക്കുന്ന പരാതികൾ നേരത്തെ ബന്ധപ്പെട്ട ഓഫീസുകളിലേക്ക് ഔദ്യോഗിക കത്തുകളിലൂടെയും ഫയലുകളിലൂടെയുമാണ് കൈമാറിയിരുന്നത്. ഈ നടപടിക്രമങ്ങളിലെ കാലതാമസം ഒഴിവാക്കി പരാതികളിൽ വേഗത്തിൽ നടപടി ഉറപ്പാക്കുകയാണ് പുതിയ സംവിധാനത്തിന്റെ പ്രധാന ലക്ഷ്യം.
പരാതികളുടെ പുരോഗതി നിരീക്ഷിക്കാം
ആഭ്യന്തരമന്ത്രിക്ക് ലഭിക്കുന്ന പരാതികളും നിവേദനങ്ങളും HM ACTS വഴി ഡിജിറ്റലായി രേഖപ്പെടുത്തും. പരാതിയുടെ സ്വഭാവമനുസരിച്ച് ബന്ധപ്പെട്ട പൊലീസ് സ്റ്റേഷനിലേക്കോ മറ്റ് ഉദ്യോഗസ്ഥരിലേക്കോ തുടർനടപടികൾക്കായി കൈമാറും.
പരാതികളിൽ സ്വീകരിച്ച നടപടികൾ എന്തൊക്കെയാണെന്നും അവയുടെ നിലവിലെ സ്ഥിതി എന്താണെന്നും മന്ത്രിയുടെ ഓഫീസിന് നിരീക്ഷിക്കാൻ കഴിയും. നടപടി വൈകുന്ന പരാതികൾ തിരിച്ചറിഞ്ഞ് ആവശ്യമായ തുടർനടപടികൾ സ്വീകരിക്കാനും സംവിധാനത്തിലൂടെ സാധിക്കും.
അടിയന്തര പ്രാധാന്യമുള്ള പരാതികളിൽ ആഭ്യന്തരമന്ത്രിയുടെ ഓഫീസിൽനിന്ന് ബന്ധപ്പെട്ട ഉദ്യോഗസ്ഥർക്ക് പ്രത്യേക നിർദേശങ്ങൾ നൽകാനും കഴിയും. പരാതികളിൽ സ്വീകരിച്ച നടപടികളുടെ വിവരങ്ങൾ പരാതിക്കാരനെ അറിയിക്കുന്നതിനും സംവിധാനത്തിൽ സൗകര്യമുണ്ടാകും. ആവശ്യമായ സാഹചര്യങ്ങളിൽ എസ്.എം.എസ്. വഴിയും വിവരങ്ങൾ കൈമാറും.
സിവിൽ പൊലീസ് ഓഫീസർ മുതൽ സംസ്ഥാന പൊലീസ് മേധാവി വരെയുള്ള പൊലീസ് ഉദ്യോഗസ്ഥരുടെ തലങ്ങളിലേക്ക് പരാതികൾ കൈമാറുന്നതിനും അവയുടെ തുടർനടപടികൾ ഏകോപിപ്പിക്കുന്നതിനും സംവിധാനം സഹായകമാകും.
കുറ്റകൃത്യങ്ങൾ തത്സമയം നിരീക്ഷിക്കാൻ HOMeS
HM ACTS-ന് പുറമെ സംസ്ഥാനത്തെ പ്രധാന കുറ്റകൃത്യങ്ങളുടെ വിവരങ്ങൾ തത്സമയം നിരീക്ഷിക്കുന്നതിനായി ‘ഹോംസ്’ (HOMeS – Home Department Operations Monitoring and e-Services) എന്ന മറ്റൊരു ഡിജിറ്റൽ സംവിധാനവും ആരംഭിച്ചിട്ടുണ്ട്.
സംസ്ഥാനത്തെ പ്രധാന കുറ്റകൃത്യങ്ങളുടെ സ്ഥിതിവിവരക്കണക്കുകൾ ആഭ്യന്തരമന്ത്രിക്കും ആഭ്യന്തരവകുപ്പിലെ ഉന്നത ഉദ്യോഗസ്ഥർക്കും തത്സമയം ലഭ്യമാക്കുകയാണ് ഇതിന്റെ ലക്ഷ്യം. ഇതിനായി പ്രത്യേക ഡാഷ്ബോർഡ് സജ്ജീകരിച്ചിട്ടുണ്ട്.
സംസ്ഥാനതലത്തിലും ജില്ലാതലത്തിലും പൊലീസ് സ്റ്റേഷൻ തലത്തിലും കുറ്റകൃത്യങ്ങളുടെ കണക്കുകൾ വിലയിരുത്താൻ ഇതിലൂടെ സാധിക്കും. പ്രധാന കേസുകളെക്കുറിച്ചുള്ള വിവരങ്ങൾ, അടിയന്തര ശ്രദ്ധ ആവശ്യമായ സംഭവങ്ങൾ, പുതിയതായി രജിസ്റ്റർ ചെയ്യുന്ന എഫ്.ഐ.ആറുകൾ തുടങ്ങിയവയുടെ വിവരങ്ങൾ സംവിധാനത്തിലൂടെ ലഭ്യമാക്കും.
എന്നാൽ കുറ്റകൃത്യങ്ങളുടെ വിവരങ്ങൾ നിരീക്ഷിക്കുന്നതിന്റെ പേരിൽ കേസ് അന്വേഷണങ്ങളിൽ ഇടപെടില്ലെന്ന് ആഭ്യന്തരമന്ത്രി വ്യക്തമാക്കി. അന്വേഷണവുമായി ബന്ധപ്പെട്ട രഹസ്യവിവരങ്ങളും പരാതിക്കാരുടെയും ഇരകളുടെയും പ്രതികളുടെയും വ്യക്തിഗത വിവരങ്ങളും സുരക്ഷിതമായി സൂക്ഷിക്കും. പൊതുവായ സ്ഥിതിവിവരക്കണക്കുകളും ആവശ്യമായ അലർട്ടുകളും മാത്രമാണ് ഡാഷ്ബോർഡിലൂടെ ലഭ്യമാക്കുക.
അധിക സാമ്പത്തിക ചെലവില്ലാതെ പദ്ധതി
കേരള പൊലീസിന്റെ ഡിജിറ്റൽ വിഭാഗമായ ഇന്റഗ്രേറ്റഡ് കോർ പൊലീസിങ് സിസ്റ്റം (iCoPS) ആണ് രണ്ട് സംവിധാനങ്ങൾക്കുമുള്ള സോഫ്റ്റ്‌വെയർ വികസിപ്പിച്ചത്. നിലവിലുള്ള സാങ്കേതിക സംവിധാനങ്ങൾ പ്രയോജനപ്പെടുത്തിയാണ് പദ്ധതികൾ നടപ്പാക്കിയത്. ഇതിനായി അധിക സാമ്പത്തിക ചെലവുണ്ടായിട്ടില്ലെന്നും മന്ത്രി അറിയിച്ചു.
പൊലീസ് സംവിധാനം കൂടുതൽ ജനസൗഹൃദവും കാര്യക്ഷമവുമാക്കുന്നതിനും സാധാരണക്കാർക്കും ഇരകൾക്കും വേഗത്തിൽ നീതി ഉറപ്പാക്കുന്നതിനുമാണ് പുതിയ ഡിജിറ്റൽ പദ്ധതികൾ ലക്ഷ്യമിടുന്നത്.
‘മൈ പൊലീസ് സ്റ്റേഷൻ’ പദ്ധതിയുടെ ഭാഗമായി സംസ്ഥാനത്തെ ഏകദേശം 5,000 പൊലീസ് ഉദ്യോഗസ്ഥരുമായി ആശയവിനിമയം നടത്തിയതായും പൊലീസ് ഉദ്യോഗസ്ഥരുടെ ജോലിഭാരവും മാനസിക സമ്മർദവും കുറയ്ക്കുന്നതിനുള്ള നടപടികൾ പരിഗണനയിലാണെന്നും മന്ത്രി അറിയിച്ചു.
പൊലീസ് സേനയിലെ വനിതാ പ്രാതിനിധ്യം 30 ശതമാനമായി ഉയർത്തുന്നതിനുള്ള നടപടികളും പുരോഗമിക്കുകയാണ്. കുട്ടികൾക്കിടയിലെ കുറ്റകൃത്യങ്ങൾ തടയുന്നതിനും സ്കൂളുകളിലും കോളേജുകളിലും ബോധവത്കരണ പരിപാടികൾ സംഘടിപ്പിക്കുന്നതിനും പദ്ധതികളുണ്ട്.
പൊലീസ് സേവനങ്ങൾ കൂടുതൽ സുതാര്യവും ജനകീയവുമാക്കുന്നതിനുള്ള ഡിജിറ്റൽ പരിഷ്കരണങ്ങളുടെ ഭാഗമായാണ് HM ACTS, HOMeS എന്നീ രണ്ട് സംവിധാനങ്ങളും ആരംഭിച്ചിരിക്കുന്നത്.